Aocunes dę’ conjoncc̨íons sont copulatiues : come qi conjoŋ̃et non seulemęnt lę’ vocables, ę claozes : mę́s aosi le sęns : come, ę, aosi, einsi, qe. Ę comcombien qe toutes conjoncc̨íons soę́t a pręndr’ ęn tęrmes jeneraos copulatiues : nous appellons ic̨y c̨ęlles copulatiues qi conjoŋ̃et le sęns auęq confirmac̨íon : come, Pięrr’ ę C̨ezar sont [p. 131r] homes, tu as eté a Rome, aosi ey je : je fęs tout einsi qe tu fęs.

Il faot ęntęndre qe l’ę copulatiu’ ęt tousjours par ę ouuęrt auant lę’ consonantes ę lę’ voyęlles, e clos, ę i : mę́s auant a, ę o, ou, u, il y peut ę́tre comunemęnt par e c̨los : combien qe pour c̨et heure je n’ęn vze pas pour ne fac̨her de tant de diuęrsités, juqes a vn aotre tęms.

Lęs aocunes sont disjonctiues du sęns : combien q’ęlle’ conjoŋ̃et lę’ vocables, ou claozes. Nou’ n’ęn auons q’une (qe je sac̨he) qi ęt ou : come C̨ezar, ou Pompée. Lęs aocunes sont continuatiues, ou condic̨ionęlles : come, si, selon, qe : exęmple, s’il dort, il repoze. Lęs aocunes sont caozalles : come, par c̨e qe, parqoę donc, donqes, dont.

Surqoę il faot ęntęndre qe nous vzons souuęnt dę’ prepozic̨íons auęq leur gouuęrnemęnt pour conjoncc̨íons : comę, je ferey votre voulęnté, par c̨e qe vou’ le merité’ bien. Lęs aocunes aosi sont negatiues : come, je ne le ferey, ny ne le direy : Gylłaome, ne Pięrre ne me feront point fę́re c̨ela.

Surqoę il faot ęntęndre qe la premiere negatiue de la premiere c̨laoz’ ęt seulemęnt auęrbe : ę ny ne conjoncc̨íon de la subseqęnte : mę́s le premier ne de la derniere claoze, ęt conjoncc̨íon : par c̨e q’ęlle conjoint deu’ noms substantifs : la ou le dęrnier n’ęt q’auęrbe qalifíant le vęrbe subseqęnt. Les aocunes sont auęrsatiues : come, mę́s, toutefoęs, combien qe, a tout le moins, ains, ainc̨oęs : come je luy ey fęt plęzir : mę́s il ęt ingrat, [p. 131v] si tu ne me veu’ fę́re bien, a tout le moins ne me fę’ point de mal.

Les aocunes sont exc̨eptiues : come, sinon, ę qe : come, je ne sac̨he home qi le fít, sinon toę, ou qe toę. Lęs aocunes sont ajonctiues : come pęndant, tandis qe : come, je ferey mon deuoęr pęndant qe tu feras le tien, ou tandis.