L’auęrb’ ęt vne partíe sans article, la sinificac̨íon duqel se joint comunemęnt ao’ vęrbes qalifiant leur acc̨íon, ou passíon, tout einsi qe fęt l’ajęctif lę’ noms appellatifs, ou propres : come, l’home saje se gouuęrne sajemęnt. Ę combien q’aocuns Auęrbes soę́t qelqefoęs articulez, come le trop de biens le gáte : c̨ela toutefoęs se fęt d’aotant q’il’ prenet nature de noms.

Combien aosi qe le propre de l’auęrbe soęt de qalifíer le vęrb’ ęn sa sinificac̨íon, si ęsc̨e toutefoęs qe nous ęn comprenons beaocoup sous c̨e nom, qi ne qalifíet point le vęrbe : come lęs auęrbes locaos ęn c̨e tręt : ję m’ęn voę la, dec̨a, dela, icy, alłeurs : non plus qe, a Rome, ao’ c̨hams, qant je dy je m’ęn voęs a Rome, ao’ c̨hams : aotremęnt il faodroęt donq dire qe tout gouuęrnemęnt de vęrbes fút auęrbe : par c̨e qe c̨ęt vn’ ajoncc̨íon ao vęrbe, sou’ leqel il faot compręndr’ aosi le partic̨ipe : come qi a la mę́me sinificac̨íon.

Il faot aosi ęntęndre q’aocuns auęrbes se joŋ̃et, ę qalifíet lę’ noms mę́memęnt ajęctifs : come, fort noęr, trop ric̨he, bien blanc. Combien aosi qe lęs auęrbes se joŋ̃ęt ao vęrbe, lęs vns toutefoęs se peuuet joindr’ a tou’ lę’ tems ę modes, ę lęs aotres non.

[p. 125v] Tous auęrbes tęrminez ęn męnt, se peuuet joindr’ a tou’ tęms, ę modes : aosi font tou’ lę’ locaos come c̨y, ic̨y, la, dec̨a, dela. Finablemęnt lę’ tęmporęlz, come hier, matin, soęr, ne se peuuet pas joindr’ a tous, pour aotant qe d’eu’ mę́mes ils sinifiet qelqe c̨ertein tęms prezęnt, passé, ou futur : ny ne se joŋ̃et gieres q’ao’ vęrbes de mę́me tęms : come je boę meintenant, je bús híer, je burey demein.

Il ęt vrey qe c̨eus qi sont de tęms prezęnt se peuuet joindr’ ao preterit perfęt detęrminé : come, j’ey bu meintenant a vous : ę ao futur, come je burey meintenant a vous, C̨eus aosi qi sont de tęms futur se joŋ̃ęt bien ao prezęnt : come je fę́s demein vn banqęt. Qant ao’ preteriz, híer ęt propr’ ao preterit indeterminé : come je fis híer, ę a tous sę’ deriuez : come, j’us hier fęt dheure.

Il ęn ęt d’aotres tęmporęls sans c̨ęrteine detęrminac̨íon de tęms : aosi se peuuet il’ ioindr’ a tou’ tęms : come, lors, allors, jamęs. Nous ęn parlerons plus exactemęnt ao trętté dęs sinificac̨íons dęs auęrbes.