Il ęt troę’ figures d’auęrbes l’une simple, come, ouí, non : l’aotre compozée, come, nany : la tiers’ ęt la decompozée, qi ęt deriuée dę’ compozez : come de maleureus maleureuzemęnt.

Or faot il ęntęndre q’aocuns auęrbes sont compozez de noms, ę vęrbes : come piec̨’a, qi ęt compozé de piec̨e, ę a, tierse pęrsone du vęrbe ey, as, a : lęs aotres de noms, ę partic̨ipes : come meintenant, de mein, ę tenant : lęs aotres de nom, ę auęrbe : come, jourdhuy, aoqęl nous ajoutons dauantaje la prepozic̨íon ao, ou le pronom c̨e : come, c̨ejourdhuy, aojourdhuy. Lęs aotres de prepozic̨íon ę nom : come, demein. Lęs aotres de pluzieurs prepozic̨íons : come parauant, ę aoparauant, qant il’ passet ęn nature d’auęrbe : qi ęt lors qil’ [p. 126v] non’ point de gouuęrnemęnt : come, ao parauant qe je vinsse, vous etyes venu. Ao demourant nous vzons bien souuęnt dęs ajęctifs, ę dę’ noms propres ę appellatifs, auęq la prepozic̨íon ęn, pour auęrbes : come, c̨’ęt combattu ęn Hęrcules, ęn home de bien, ęn saje capiteine : la ou ęn, son’ aotant qe come.

Nou’ nous ęydons aosi pour auęrbes de la prepozic̨íon a, ęn supplíant mode, ę luy aioutant vn denominatif : come, il vit a l’Italiene, a la Franc̨oęze. Nou’ lęs supplions aosi par lę’ denominatifs femenins auęq la prępozic̨ion de : come, il vit de prouidenc̨e, il court de vitęsse : toute’ lę’qęlles fac̨ons sont mieus rec̨úes, ę plus aggreables, qe lęs auęrbes mę́mes : de sorte qe, il court de vitęsse, sone mieus qe, il court vitemęnt : combien q’il soęt bon langaje.