Le Vęrb’ ęt vne partie du langaje sinifíant acc̨íon, ou passíon, auęq tęms, ę modes. Ę combien qe le Verbe substantif ętre, ne sinifíe point acc̨íon, ne passíon, denotant seulemęnt lexistęnc̨e d’une c̨hacune c̨hoze, qi ęt sinifiée par le nom qi le gouuęrne : come je suys, tu ęs, il ęt, ę q’il denote plutót la pęrfęcc̨íon dęs acc̨íons, ę passíons : il ęt toutefoęs si nec̨essę́r’ a toutes acc̨íons, ę passíons [p. 62r] qe nou’ ne trouuerons vęrbe qi ne se puysse rezoudre par luy : par c̨e qe tout’ acc̨íon, ou passíon reqiert existęnc̨e.

Non sans caoze donqes lę’ Franc̨oęs ont forjé leur passifs par luy. Or faot il ęntęndre qe tout einsi qe toutes lęs euures de natur’ ę dęs c̨hozes naturęlles, reqieret ę́tre menées a fin par acc̨íon, ę passíon, qe nou’ ne pouuons aosi parler d’ęlles sans qelqe partíe de langaje qi sinifiát acc̨ion, ou passion.

Mę́s pour aotant qe lęs c̨hozes peuuet ę́tre sans fę́r’ vne mę́m’ acc̨íon, ou soufrir : tęllemęnt q’une acc̨íon, ou passíon peut auoęr eté fętte, ou q’ęlle se fęt, ou fera : a bone ręzon l’uzaje de la parolle a attribué le tęms a la partíe, qi lęs sinifieroęt, qil a voulu appęller Vęrbe : qi ęt vn tęrme Latin a verberatu aeris (come dit Prisc̨ian) qi vaot aotant a dire, a c̨aoze du battemęnt d’ęr.

Il ęt vrey qe toutes parolles sont battemęnt d’ęr : mę́s pouraotant qe c̨ete partí’ ęt la plus díne : d’aotant qe sans ęlle nou’ ne trouuons aocun sęns ęn qelq’ amas q’on fasse dęs aotres, on luy a, a bone ręzon attribué c̨e nom de Vęrbe : come par exc̨ellęnc̨e. Ę combien qe lę’ partic̨ipes fasset de mę́mes, il’ ne le font toutefoęs qe come deriuez d’eus. Ao demourant le Vęrb’ a huyt acc̨idens : qi sont la sinificac̨íon, le tęms, le mode, l’espęc̨e, la figure, la conjugęzon, la pęrson’ ę le nombre.