Le futur de l’optatif a diuęrses formes selon la diuersité dę’ conjugęzons. C̨eluy donq de la premiere se forme du prezęnt indicatif auęq lęs ajoncc̨íons propres : come, qe je l’ęyme jamę́s : il veut qe je l’ęyme. Qant ao plurier, le futur ęmprunte la premier’ ę seconde pęrsones du preterit impęrfęt de l’indicatif : de sorte qe nou’ dizons, ęymyons, ęymyez.

Ao demourant la tięrse du plurier se pręnt de c̨ęlle du prezęnt indicatif. Par c̨e moyen nou’ dizons qe nous ęymyons, vous ęymyez, q’il’ ęymet : come, [p. 98v] il veut qe nous ęymyons, qe vous ęymyez, q’il’ ęymet.

Mę́s il ne nou’ faot pas oublier aller, leqel l’uzaj’ a ęnric̨hy plus qe lęs aotres : d’aotant qe de voęs son prezęnt indicatif, il luy a tourné c̨ęt s ęn ze, zes, ze : de sorte qe nou’ dizons je voęze, tu voęzes, il voęze, ne luy donant ao plurier qe la tierse pęrsone formée de c̨ęlle du singulier ęn luy ajoutant t, come voęzet : ę non contant de c̨e, il luy ęn a formé vn aotre suyuant la nature de c̨eus qi ont al, auant loęr : come, valloęr : tęllemęnt qe nou’ dizons, alłe, alłes, alłet, alłions, alłięz, alłet, tout einsi qe c̨halłe, c̨halłes, c̨halłe, c̨halłions, c̨halłięs, c̨halłet.

Or qant a la second’ ęn oęr, ęll’ a come de coutume diuęrses formes. Vouloęr donc ę douloęr, formet c̨e futur de leur premiere pęrsone veuil, deuil, ęn luy ottant l’y ę ajoutant a l finalle par ł molle, łe, łes, łe, łyons, łyes, łet : come qe je veulłe, tu veulłes, il veulłe, nou’ veulłyons, vou’ veulłyez, il’ veulłet : ę einsi de deulłe.

C̨ęus qi ont al auant loęr, tournet (come ja je l’ey dit) loęr, ęn łe, łes, łe, tout einsi qe nou’ l’auon’ dit d’aller : come, qe je valłe, lłes, lłe, lłyons, lłyez lłet : falloęr ao demourant ne se rezęrue qe falłe, com’ impęrsonęl : ę pręte le tout a falłir.

Ao regard de tou’ lęs aotres ęn oęr, il’ formet leurs singulieres pęrsones de la tierse du plurier du prezęnt indicatif, ęn ottant t, pour la premier’ ę tierse, ę le tournant ęn s pour la seconde : ę qant ao plurier il’ la [p. 99r] gardet ęntiere pour la tierse, ęmpruntans lę’ premier’ ę seconde plurieres de c̨ęlles du preterit impęrfęt.

Come donqes voęr fasse voyet ęn la tierse pęrsone du plurier du prezęnt, nou’ dirons qe je voye, tu voyes, q’il voye, q’il’ voyet : mę́s qant a la premier’ ę seconde plurieres, il n’ęt pas euidęnt ęn c̨eus qi ont yo, ę yez ao prezęnt, q’il’ lę’ preŋ̃et plutót du prezęnt qe du preterit impęrfęt : d’aotant q’ilz sont de mę́mes.

Parqoę nou’ lę’ pouuons jujer aosi tót du prezęnt qe du preterit : męs qant aoz aotres, il ęt tout manifęste : come, de dec̨oęuet je dec̨oeue, tu dec̨oęues, il dec̨oęue, nou’ dec̨euyons, dec̨euyęz, q’il’ dec̨oęuet. Sur qoę il faot exc̨epter auoęr leqel fęt aye, ayes, aye, ou eyt, nous ayons, vous ayez, q’il’ ayet : qoe q’il fasse ont ęn la tięrse pluriere du prezęnt.

Sauoer fęt sac̨he, sac̨hes, sac̨he, sac̨hions, sac̨hiez, sac̨het : pouuoęr aosi ne forme pas son futur de peuuet : mę́s pour aotant q’il a a la premiere pęrsone du prezęnt indicatif, puys, ęn y ajoutant se, ses, se, syons, syez, set, nou’ formerons je puysse, puysses, puysse, puyssions, puyssiez, puysset, pour le futur de l’optatif. Ao regard de soloęr il n’ęn n’a point.

Qant a la tierse conjugęzon ęlle fęt de mę́mes qe voęr, dec̨euoęr, prenant la tierse pęrsone du prezęnt indicatif : ę ęn sęmblable lę’ deu’ plurieres premier’ ę seconde du preterit impęrfęt : come, de díet, qe je díe : tu díes, q’il díe, qe nou’ dizyons, [p. 99v] dizyez, dizet.

De conoesset, conoęsse, conoęsses, conoęsse, conoęssyons, conoęssyez, conoęsset : de prenet, je prene, tu prenes, il prene, nou’ prenyons, prenyez, prenet.

Sur qoę il faot excępter fę́re, leqel fęt font ęn sa tierse pęrsone : combien q’il fasse fasse, fasses, fasse, qe nou’ pourrons former de la premier’ ou seconde du prezęnt fę́s, come nous auons fęt puysse, de puys, ęn ajoutant se sęs, &c. ę ęn tournant l’ę ouuęrt ęn a, auęq leqel il a grande conuenanc̨e : par c̨e moyęn nou’ dirons qe je fasse, tu fasses, il fasse, qe nou’ fassyons, fassyes, il’ fasset : ny n’ęmprunte pas la premier’ ę seconde pęrsones plurieres du preterit impęrfęt qi fęt fezions, feziez.

La qarte conjugęzon fęt de mę́mes qe la tierse : de sorte qe de fuyet, vient je fuye, tu fuyes, il fuye, nou’ fuyons, vou, fuyez, il’ fuyet.