Notre lang’ a deu’ preteriz pęrfęs, dę’qel’ l’un le plussouuęnt se peut former de l’infinitif preterit, ęn tournant seulemęnt l’é long, ęn la diphthong’ ey, pour la premiere pęrsone de la premiere conjugęzon : par c̨e qe tous sęs infinitifs preteriz, sont tęrminez ęn é long : leqel dauantaje nou’ tournerons ęn as, pour la seconde, ę ęn a, pour la tierse, ę ęn amęs, attes, aret, ou eret, pour c̨ęlles du plurier.

Par c̨e moyen nou’ dirons d’ęymé, j’ęymey, tu ęymas, il ęyma, nous ęymames, vous ęymattes, il’ ęymaret, ou ęymeret. Surqoę aosi il faot noter, q’aocuns ne c̨hanjet rien pour la premiere singuliere : dizans j’ęymé pour j’ęymey.

E combien qe l’abus se soęt efforc̨é, ę efforc̨’ ordinęremęnt ęn vne grande partíe de c̨ę’ vęrbes de dire, i, pour a, dizans, je l’ęymi, tu l’ęymis, il m’ęymit, nou’ l’ęymimes, vou’ l’ęymittes, il’ l’ęymiret : il n’ęn n’a toutefoęs jamęs eté pac̨ifiqe possęsseur : de sorte q’il s’ęn ęt tousjours trouué, qi ont debattu c̨e dezordre de parłer.

Parqoę il c̨’ęnsuyt qe tout einsi qe la loę doęt vuyder tous differęns [p. 86v] ę c̨ontrouuęrsíes qi sont ęntre lęs homes : la ręgle comun’ aosi d’un langaje deura vuyder lę’ differęns qi y ęntreuienet : suyuant laqęlle je dy qe tou’ vęrbes tęrminez ęn er, ęn leur infinitif, deuront (sans nul exc̨epter) garder ao preterit lęssudittes tęrminęzons.

Suyuant donq la regl’ il nou’ faot confesser q’alimes, frapimes, c̨hassimes, donimes, ęymimes, ę leurs sęmblables, aueq toutes leur’ pęrsones par i, come ęymit, donit, frapit, sont prec̨edées d’ęrreur, ę d’iŋ̃oranc̨e de la formęzon dę’ vęrbes de la premiere conjugęzon ęn er.

La seconde conjugęzon ęn oęr, form’ aosi son premier preterit pęrfęt de l’infinitif preterit. C̨eus aosi qi ont l, auant oęr, font leur infinitif ęn tournant oęr ęn u, come de vouloęr, voulu, de douloęr, doulu, de c̨halloęr, c̨hallu, de falloęr fallu, de valloęr, vallu, de soloęr, solu, duqel infinitif passé se forme la premiere pęrsone singuliere : a laqęll’ on peut ajoindre s, tout einsi q’a la seconde, ę t, a la tierse.

Ao regard du plurier, il fęt vmes, vttes, vret : come de solu, je solu, ou solus, tu solus, il solut, nous solumes, vous soluttes, ils soluret : je vallu, ou vallus, tu vallus, il vallut, nou’ vallumes, valluttes, valluret : ao regard de fallu, il n’a qe la tierse pęrsone singuliere, il fallut. Ę qant a soęr, ę sę’ compozez, il’ tournet oęr, ęn is, ęn l’infinitif, ę le gardet ęn la premier’ ę seconde pęrsones du singulier : come je sis, tu sis : [p. 87r] qant a la tierse, ęll’ a t, pour s, il sit : le plurier fęt imes, ittes, iret, assimes, assites, assiret.

C̨hoer dút fę́re come lę’ prec̨edęns son infinitif ęn u : come c̨hu, inuzité qoę qe son premier preterit, je c̨hu soęt vzité. Ao regard d’apparoęr, ou apparoętre, il fęt tout einsi qe conoętre : de sorte q’apparu, peut ę́tre tyré de l’un ou de l’aotre : ę par conseqęnc̨’ il fęt de mę́mes qe voulu, vallu : de sorte qe nou’ dizons j’apparu, ou apparus, apparumes, uttes, uret.

Ręst’ a vuyder c̨eus qi ont u, consonant’ auant oęr, come voęr, ę sę’ compozez : auoer, sauoęr, pouuoęr, mouuoęr. Voęr, donqes ę tous sę’ compozez, ę finablemęnt tous c̨eus qi ont u consonante, tęrminet leur infinitif ęn u, mę́s par diuers moyen : car voęr, ę lęs siens tournet oęr ęn u : come voęr vu : pouruoęr pouruu.

Ę combien qe le preterit pęrfęt dút ętre de mę́mes, ęn tous : voęr toutefoęs, preuoer, ę reuoęr, tournet u, ęn i, is, it : come je le vi, ou vis, tu vis, il vit : nou’ vimes, vittes, viret. reui, reuis, reuit, reuimes, preuis, preuimes : la ou pouruoęr, fęt je pouruu, tu pouruus, il pouruut, pouruumes &c.

Mę́s auoęr, ę sauoęr, ottet uoęr, ę tournet a ęn u : tout einsi qe c̨eus qi ont, ou auant uoęr, l’y tournet aosi ęn rejettant le voer, de sorte qe d’auoęr, sauoęr, se forme, u, su : ę de pouuoęr, mouuoęr, pu, mu : c̨e qe de mę́mes fęt l’e simpl’ ę non compozé prec̨edant voęr : come de rec̨euoęr, dec̨euoęr, conc̨euoęr, appęrc̨euoęr, se forme rec̨u, dec̨u, [p. 87v] conc̨u, appęrc̨u : c̨e qe ne peut fę́re preuoęr par c̨e qe l’e, ęt a caoze de la compozic̨íon de pre.

Leur’ preteriz dronq pęrfę́s ont l’u, pour leur characteristiqe, tout einsi qe vouloęr. Par conseqęnc̨e nou’ dirons, je su, tu sus, je dec̨u, tu dec̨us. Ny ne voę point qe la diphthonge eu, y soet prononc̨ée, qoę qe noz ecriueins ęn font etat : ecriuans eu, veu, dec̨eu, ę einsi dęs aotres : combien qe pas vn de nous, ne lęs ozeroęt prononc̨er par la diphthonge eu : car la prolac̨íon Franc̨oęze se contęnte de l’u seul.

Dont je m’emęruęlłe qe puis qe nou’ voulons fę́re notes de differęnc̨es, come qe c̨e soęt a tort, ou a droęt, qe c̨ę’ grans philosophes ęn ecritture, ne se sont auizéz de lęsser vu, de voęr, sans diphthonge, pour la differęnc̨e de veu, qi vient de votum : qi ęt vne promęsse libremęnt fętte : ę qi reqiert la dipthonge, eu, ęn sa prononc̨íac̨íon : come mę́mes l’obsęrue l’ecritture : ę qil’ n’ont fęt le sęmblable de pus, mus, demus, a la differęnc̨e de peus, meus, demeus. qi sont du prezęnt indicatif : vu q’ęn le fęzant, le deuoęr de la prononc̨íac̨íon ę de l’ecrittur’ y etoęt obsęrué, auęq la differęnc̨e.

Car qant nou’ dizons tu demęus Pięrre de son veu : vu qe tu ne fús onqes qi le mut, nous oyons eu ęn demeus seconde pęrsone de l’indicatif, ę ęn veu : prononc̨ans seulemęnt l’u, ao vu subseqęnt partic̨ipe passif, egal a linfinitif, ę ęn mut tierse pęrsone du preterit pęrfęt. Pour donqes pouruoęr ę́zémęnt a c̨et abus, tenez [p. 88r] pour ręgle jeneralle q’il ne se trouuera ęn toute la lange Franc̨oęz’ aocun infinitif, ne par conseqęnc̨’ aocun preterit pęrfęt, ne partic̨ípe passif, qi se tęrmin’ ęn la diphthonge, ęu.

Poursuyuons la tięrse conjugęzon, apres auoęr vuydé pluuoęr, ou plouuoęr qi fęt plu. La tierse donqes a sę’ diuęrsités de former son premier preterit. Si donqes l’infinitif a auant re, la voyęlle ę, ouuęrt’ ę seule, come, ęn fęre, tę́re, plę́re, qe vous auez de coutume d’ecrire par la diphthonge ai) le preterit aora l’u, pour c̨haracteristiqe, tout einsi qe l’infinitif passé.

Tę́re donqes fera je tú, tu tús, il tut, nou’ tumes, vou’ tuttes il’ turet : ę plęre, je plú, ou plús, tu plús, il plut, nou’ plumes, vou’ pluttes, il’ pluret. Sur qoę il faot ęntęndre qe c̨et ú ęt long ę’ premier’ ę seconde pęrsones du singulier par toutes lę’ conjugęzons, ę’ qęlles il se ręncontre.

Ę combien qe fę́re, fass’ ęn son infinitif fęt, ę non pas fut, ne fit, il fęt toutefoęs son preterit par la characteristiqe i : d’aotant qe vou’ n’auez qe troę’ voyęlles propres ao’ preteriz : qi sont a, pour la premiere conjugęzon, qi ęt inuariable, fors qe la premiere pęrsone qi a ey, ou é long : la seconde ęt í, ę la tierse l’u, qi sont comunes aoz aotres troęs conjugęzons : fę́re fęt donq je fi, ou fis, tu fis, il fit.

Ao regard de rę́re, il n’ęn n’a point de soę qe je sac̨he : qoę q’il sęmbl’ auoęr rę́s ęn l’infinitif passé. Qant a brę́re, il ne forme point d’infinitif de soę passé, aosi ne fęt il [p. 88v] de preterit pęrfęt : de sorte qe brahyer inuzité, ęn forme vn vzité selon sa tęrminęzon, ę dizons brahyé : ę de luy je brahyey, tu brahyas, suyuant la ręgle de la premiere conjugęzon.

Ę combien aosi qe trę́r’ auęq tous sęs compozez, fasse bien son infinitif passé ęn ęt, tout einsi qe fę́re : de sorte qe nou’ dizons tręt, pourtręt, distręt, retręt, il ne forme toutefoęs pas le premier preterit pęrfęt. Ę pourtant si trę́re, ęn a aocun, c̨’ęt trahyey, deriué de trahyer inuzité : de sorte q’il nou’ faodra dire, je trahyey, as, a : qi ęt vn vęrb’ vzurpé, ę comun ao’ vac̨hiers ę vac̨hieres : aosi appęllet il’ lę’ bouz du pis dęs vac̨hes trahyons.

Ao demourant pourtrę́r’ ę distrę́re, font de mę́mes : de sorte qe nou’ pouuons dire, je distrahyey, as, a : ny n’ęn n’auon’ point d’aotre : ao regard de retrę́re, il n’ęn forme point ęn notre lange : par c̨e qe retirer, l’ęn fournít.

C̨eus qi ont i, auant re, ou la diphthonge uy, ont comunemęnt l’i, ao preterit pour characteristiqe. Mę́s il faot ęntęndre qe le plus souuęnt leur singulier ęt tout tęl, qe c̨eluy du prezęnt indicatif : parqoę nous somes contreins de le prononc̨er long : come je dís, tu dís, il dít, ao preterit : come, tu dis, qe je le dís.

A c̨ete caoze qelqes vns cuydans noter c̨ete differęnc̨’ ęn ont fęt vne diphthonge, ei : come je dey, fęzans vn tan’ plus grand dezordre par vn’ occazíon de faose lęcture. Ao regard de la diphthonge uy, il me sęmble q’ęlle se doęt proferer diuizé’ ęn tenant [p. 89r] l’í long ao preterit, plutót qe de luy ajouter zi, car nou’ ne pouuons rec̨euoęr deduyzi, detruyzi : de vrey si nou’ dizions je detruís, tu detruís, nou’ garderions la ręgle dęs aotres : qoę qe c̨e soęt, il faot nonobstant tous auis, demourer a c̨eluy qe l’uzaj’ aothorizera.

Ao demourant tou’ c̨eus qi ne retienet point l’i ęn l’infinitif passé, ne l’ont point aosi ao preterit : come, lire, qi d’aotant q’il fęt lu ęn l’infinitif, fęt aosi l’u ao preterit : come je lú, ou lús, tu lús, il lut.

Ę combien q’ecrire, ne fasse q’ecrit a linfinitif passé, il tourne toutefoęs c̨e t, ęn ui, ę fęt j’ecriuy, ou ecriuis, tu ecriuis, uit, uimes, uittes, uiret. Venons meintenant ao’ vęrbes qi ont consonantes auant re. Sur qoę il faot noter qe notre lang’ a qelqefoęs ęntrejetté le d, ę le t, a aocuns vęrbes qi ne leur sont pas naturęlles : come d, ęn soudre, ou souldre : ę leur’ compozez : ę aosi ęn peindre, oindre, creindre, qi sont extrę́s de soluere pingere, ongere : le t, aosi ęn conoętre.

A c̨ela conoęsson’ nous q’il’ ont eté ęntrejettez, pour euiter qelqe son mecontęntant l’oręlłe : come soulre, peinre, qe nou’ ne lę’ voyon’ point ęs aotres formęzons dę’ tęms, sinon la ou r, se rencontre, tout einsi q’ęn l’infinitif : la ou ao contrerę́re, si c̨ę’ voęs sont de l’essęnc̨e du vęrbe, nou’ lę’ voyons ęn l’infinitif mę́me passé : come de mordre, mordu, de tondre, tondu, tout einsi qe de veincre, veincu, de battre, battu, de rompre, rompu.

Tou’ c̨eus donqes qi n’ont point ęmprunté aocune [p. 89v] consonant’ etant d’auant re, formet leur infinitif passé ęn tournant re, ęn u : ę leur preterit pęrfęt ęn tournant u, ęn i, come de veincre, veincu, ę de veincu, veinqi, qis, qit, de mordre, mordu. Ę combien q’on estime mors melłeur, mordu toutefoęs ęt suyuant la ręgle, ę qi forme le preterit pęrfęt, mordi, mordis mordit : de battre, battu, batti, battis, battit.

Sur qoę il nou’ faot exc̨epter clorre, leqel fęt clos ęn son infinitif preterit, aossi fęt de mę́mes forclorre, ę eclorre : lę’qels toutefoęs n’ont point de premier preterit qi soęt ęn vzaje s’il n’ęt par u : come qi diroęt je forclus, clus, clut, clumes, &c. qant a exclurre, nou’ n’ęn auons q’exclus : combien q’ils seroę́t rec̨euables. Ao regar de conclurre, il fęt conclu, ęn lęssant lęs deus rr, ę e : duqel il forme son pretęrit ęn u : come je conclú, ou conclús, tu conclús, il conclút, nou’ conclumes, concluttes, concluret.

Par c̨e moíen le singulier ęt tout tęl qe c̨eluy du prezęnt, sinon qe l’u, ęt ic̨y long. Il faot aosi exc̨epter ítre, ę títre, qi ne formet pas leur infinitif preterit : car il’ sont formez de issir, vzité, ę de tissir, inuzité, fęzans issu, ę tissu : ao demourant il’ font leur’ preterís ęn i.

Il faot aosi exc̨epter couru, qi desc̨endu de courre selon la ręgle, ne fęt pas couri, couris : car il fęt couru, courus : ao regard d’ardre il ne forme point de preterit pęrfęt de son infinitif preterit art, ou ard : combien q’il fęt ardi, ardís, come s’il auoęt ardu, a la forme dęs aotres.

[p. 90r] Il nou’ faot aosi ęxc̨epter viure, qi ne fęt pas viuu : par c̨e q’il fęt vec̨u, duqel suyuant la ręgle se forme veqi, veqis, veqit. Męttr’ aosi ne fęt pas mettu : car nou’ dizon’ mis, fezant ao preterit de mę́mes. Ao regard de l’infinitif suyui, il ęt formé de suyuir : parqoę son preterit suyt la qarte conjugęzon, qoę qe le prezęnt indicatif soęt de la tierse, come nou’ l’auons dit.

Ę qant ao’ vęrbes, qi ont qelqe d, ou t, ęntrejetté, dont je vous ey ja balłé le moyen de lę’ conoęrre, il faot ęntęndre q’il’ ottet la consonante auęq re : ę si qelqe voyęll’ ou diphthonge lę’ prec̨ede, il la tournet ęn u : come de pę́tre, pu, de conoętre, conu : de paroętre, ę sęs compozez paru.

Il ęn faot exc̨epter n’ę́tre, qi fęt né, ęn son infinitif passé, ę fęt ęn son preterit je naqi, tu naqis, il naqit, &c : mę́s si c̨’ęt qelqe consonante, on luy ajoute u : come de mouldre, molu, de souldre, soulu. Ę combien qe parauantur’ aojourdhuy l, ne se prononc̨e pas ęn souldre, mouldre, c̨e n’ęt pas a dire pourtant qe le deriué n’ęn soęt formé, qoę qe l’uzaj’ eyt supprimé la sourse, de sorte q’aojourdhuy on díe plutót soudre, moudre, rezoudre.

Combien aosi qe par c̨ete rę́zon coudre, dút fę́re cu, l’uzaje a voulu transmuer c̨e d, ou bien s, de consuere ęn z. Mę́s si la consonante n, prec̨ede dre, ou tre, ęll’ a sa ręgl’ a part : car tous c̨ęs aotres prec̨edęns font leur preterit ęn u : tout einsi qe fęt l’infinitif passé dont ils sont formez : de conoętre donq se forme [p. 90v] l’infinitif passé conu : ę de luy le preterit je conú, tu conús, il conut : de couzu, je couzús, zús, zut : de rezoudre, rezolu, je rezolús.

Si n donq prec̨ede dre, auęq la diphthonge ey, ou oy : come, peindre, feindre, oindre, le preterit pęrfęt ne se forme pas de l’infinitif passé, qi ne tourne qe dre, ęn t : come de peindre, peint, d’oindre, oint : car nou’ le tiron’ plus ęzémęnt du preterit impęrfęt, ęn c̨hanjant sę’ tęrminęzons ęn c̨ęlles du preterit pęrfęt, par la characteristiqe i, de sorte qe de peŋ̃oę, peŋ̃oęs, peŋ̃oęt, peŋ̃ions, peŋ̃iez, peŋ̃oę́t : nou’ dirons peŋ̃y, ou peŋ̃is, peŋ̃is, peŋ̃it, peŋ̃imes, peŋ̃ittes, peŋ̃iret.

Ao regard de pręndre, il ęt de c̨eus qi ont le d, ęntrejetté, qoę qe prendere Latin soęt sa sourse, aoqel il ęt naturęl. Ma ręzon ęt qe nou’ ne trouuon’ point c̨e d, ęn sęs formęzons : de vrey nou’ dizon’ bien, je pręn, pręns, pręnt, tout einsi qe je tęn, tęns, tęnt : Mę́s nou’ ne dizon’ pas, pręndons, pręndez, pręndet : come tęndons, tęndez, tęndet : ny ne se ręncontre q’auant r : com’ ao futur pręndrey, pour la mę́me caoze q’il se ręncontre a l’infinitif : combien q’aocuns dizet pręnre, ę pręnrey.

Il a donqes auęq sę’ compozez, non seulemęnt otté dre, pour former son infinitif passé, le tournant ęn s, mę́s aosi a il tourné ę, de pręn ęn i, de sorte qe nou’ dizons, prins, comprins, gardant ao preterit c̨et n, par tout le singulier : come je prin, ou prins, tu prins, il print : ę qant ao plurier, il ott’ a [p. 91r] la premiere pęrsone, qant a la seconde, ęll’ ęt ęn deu’ manieres : ao regard de la tiers’ on la fęt ęn troęs sortes, tęllemęnt qe nou’ dizons, nou’ primes, vou’ printes, ę prittes, il’ prinret, prindret, ę priret : combien qe prittes, ę priret selon la ręgle sont beaocoup mieus rec̨uz.

Ao regard de pondre, nous l’auons tyré de ponere vęrbe Latin, duqel aosi nous auons le vęrbe pozer : parqoę il y a apparanc̨e qe c̨e d, ęt ęntrejetté, ę par conseqęnc̨e c̨eus ont bone ręzon qi dizet qe nou’ deuons dir’ ęn l’infinitif ponu : ę non pas pondu : duqel ęnsuyuant la ręgle, nou’ dirons, je ponu, tu ponus, ao preterit pęrfet : ę tel le garde l’uzaje. Voęla qant ao’ premiers preteriz pęrfęs de la tierse conjugęzon.

Venons a la qarte. La qarte conjugęzon qi a son infinitif ęn ir, fęt le plus comunemęnt son infinitif passé ęn y, ou i : come de suyuir, suyuy : duqel aosi se forme le preterit pęrfet auęq lę’ tęrminęzons comunes dę’ preteriz ęn i : come de falłir, falłi, je falłi ou falłís, tu falłís, il falłit. Ę combien qe couurir fasse couuęrt, ęn son infinitif passé, il ne lęsse pas pourtant a fę́re, je couuri, tu couuris, il couurit : ę si vne voyęlle pręc̨ede l’i, ęlle ne fęt pas diphthonge, de sorte qe l’i, ęt tousjours long : come je fuís ou fuí, tu fuís, il fuít, nou’ fuímes, fuítes, fuíret.

Combien aosi qe mourir soęt de c̨ete conjugęzon, son preterit toutefoęs tient de la tierse : par c̨e q’il fęt je mourú, ou mourús, tu mourús, il mourut, de [p. 91v] l’infinitif mourre inuzité. Ao demourant il n’a point d’infinitif passé : combien q’il eyt ęn son partic̨ipe mort : a c̨ete caoz’ il n’a pas son second preterit par le vęrbe ęy, as, a, qi reqiert vn infinitif passé : mę́s par le vęrbe substantif : par qoę ao lieu de dire j’ey mort, nou’ dizons je suy’ mort, attęndu qe le premier ęmport’ acc̨íon, ę le second (qi ęt le partic̨ipe) passion.

Courir, aosi fęt son preterit de courre, come nou’ l’auons ja dit. Ao regard de tenir, ę venir, il’ ne formet pas leur pręterit de leurs infinitifs passez : combien qe venir, n’ęn na point, qoę qe nou’ dizions venu, aosi bien qe tenu : car il ne peut soufrir le gouuęrnemęnt de ey, as, a : parqoę il n’ęt qe partic̨ipe tout einsi qe mort, ę allé : vu qe nou’ ne dizon’ point j’ey venu.

C̨ę’ deu’ vęrbes donqes formet leur preterit du prezęnt ęn ottant l’e de la premiere, second’ ę tierse du singulier : come de, je tiens, ou tien, tu tiens, il tient, je tins, ou tin, tu tins, il tint. Qant ao plurier, nous ajouterons a la premiere lę’ tęrminęzons plurieres, de sorte q’ de tin, nou’ dirons, timmes (car n, auant m, pręnt la mę́me nature) puis subseqęmmęnt tintes, tinret : aoqel tinret nou’ jetterons ęntre n, ę r, vn d, suyuant la proprięté de la lange Franc̨oęze, ę dirons tindret : c̨e qe de mę́mes nou’ fęrons a venir, ęn dizant vin, vins, vint, &c : ę de leurs compozez retenir, detenir, reuenir, deuenir, contreuenir, ęntretenir.

Ao regard de qerir, il fęt [p. 92r] qis, tant ęn son infinitif passé, q’ao preterit : come, je qís, tu qís, il qít, nou’ qímes, vou’ qítes, qíret. Combien aosi qe ferir fasse feru ęn son infinitif, il garde toutefoęs l’i ęn son preterit : c̨e vęrbe n’ęt pas toutefoęs fort ęn vzaje’ si c̨e n’ęt ęntre lęs poę́tes.

Qant a jezir, il fęt iu ęn son infinitif, ę par conseqęnc̨’ ao preterit indęterminé, je ju, ou jus, tu jus, il jut, &c. dont ęt venu le vęrbe juc̨her. Mę́s vetir, fęt vetu, ę ao preterit veti, vetis, vetit.