Il y a deus espec̨es de vęrbes, l’une primitiue, com’ ęymer : l’aotre deriuatiue, come, de melancholíe, melancholíer : de cholęre, cholerer, de fięn, fianter, de botteao, botteller, de ris, ríre. Ao regard de c̨ęs deriuatifs Latins : come le freqęntatatif, meditatif, ę dezideratif, lę’ Franc̨oęs n’ęn n’ont point (qe je sac̨h’) ęn c̨ete sinificac̨íon.

Ę qant a linchoatif, nou’ le vuydons par le vęrbe comęnc̨er : come je comenc̨’ auoęr feim. Ęt le meditatif Latin ęn rio par vęrbes de dezir : come pour parturio, je dezire, je veus ęnfanter. Ę qant ao’ freqęntatifs, nou’ lę’ vuydons par l’auęrbe souuęnt, ę sęs sęmblables : come, je le hante, ou voę souuęnt.

Ę combien qe viziter, soęt tiré de visito Latin ę freqęntatif, il n’ęn garde pas toutefoęs la sinificac̨íon ęn notre lange : tęllemęnt q’il a bezoin de l’auęrbe souuęnt : come, je vizite souuęnt le Palęs, lę’ prizoniers. Nous ęn auons qi sinifíet imitac̨íon tęrminęz ęn zer : come tyranizer, Latinizer, Grec̨izer.