Or qant a la formę́zon dę’ pręteriz impęrfę́s, ęll’ ęt bien ęzée : d’aotant qe tous jeneralemęnt sont formez de la premiere pęrsone du plurier du prezęnt, ęn tournant ons, ęn oę, ou oęs, pour la premiere pęrsone : oęs pour la seconde, ę oęt pour la tięrs’ ao singulier (pour lę’qels vous abuzez ęn l’ecritture de la diphthonge, oy) ę ęn oyons, pour la premiere du plurier, yez, pour la seconde : ę ęn oę́t, pour la tierse, qe vous ecriuez par oyent, qi ęt męruelłeuzemęnt etranje de la prononc̨iac̨ion : laqęlle ne la fęt point aotre qao singulier, sinon, d’aotant qe l’ę ouuęrt du plurier, ęt de plu’ longe prolac̨íon.

Nou’ dirons donc j’ęymoę, ou ęymoęs tu ęymoęs, il ęymoęt, nous ęymions, vous ęymyęz, il’ ęymoę́t : pour j’ęymoy, tu ęymoys, il ęymoit, ę il’ ęymoyent. Sur qoę il faot ęntęndre, qe si le plurier du prezęnt a yons ęn la premiere, q’allors l’imperfęt ne c̨hanje rien ęn se’ premier’ ę seconde pęrsones : de sorte qe nou’ dizons pryons, voyons, fuyons, voyez fuyez, oyons, oyez, tout einsi q’ao prezęnt, lę’qels toutefoęs dusset fę́re voiyons fuiyons : mę́s l’uzaje ne lęs a pas rec̨us.

Ę combien qe soloęr, soęt priué du prezęnt de l’indicatif, il n’ęt pas toutefoęs sans preterit impęrfęt, forjé come lęs aotres de solons, solez, solęt, [p. 86r] inuzitez : ou bien de l’infinitif, ęn ottant r, pour la premiere pęrsone, ę fę́zant ao demourant lę’ męmes tęrminęzons dęs aotres : come je soloę, tu soloęs, il soloęt, lyons, lyez, soloę́t.