Lęs Imperatifs de toutes lę’ conjugęzons, n’ont qe c̨eluy q’on appęlle prezęnt : leqel la premiere conjugęzon forme comunemęnt du prezęnt indicatif : ę come tous imperatifs nayet ao singulier qe la second’ ę tierse, la seconde n’ęt differęnte de c̨elle du prezęnt [p. 95r] indicatif, sinon q’ęll’ otte s : de sorte qe nou’ dizons ęyme, pour ęymes : qant ao plurier, il ęt tout tęl qe c̨eluy du prezęnt : par c̨e moyen nou’ dizons, ęymons, ęymez, ęymet.

Il faot toutefoęs exc̨epter aller, qi fęt vas, ę va : ę qant ao’ deu’ tierses, il lęs ęmprunte du futur optatif, ou du prezęnt subjonctif : parqoę il fęt vas, voęze, allons, allez, voęzet.

Ao regard de la seconde : c̨eus qi ont oul auant oę, come vouloęr douloęr, n’ont point d’imperatif, ę l’ęmpruntet du subjonctif : tęllemęnt qe vouloęr, ę douloęr font veulłes, deulłes, veulłe, deulłe : mę́s qant ao plurier, il’ ottent i dę’ diphthonges io, ę iez du subjonctif : de sorte qe nou’ dizons veulłons, veulłez, pour veulłions, veulłiez : ao regard de la tierse, ęlle ne múe rien, fę́zant veulłet, deulłet.

C̨ęus qi ont al auant loęr : come, c̨halloęr, valloęr, falloęr, ęmpruntet la seconde pęrsone du prezęnt : come vaos, faos, c̨haos : combien qe faos sęrt a falłir, ę non pas a falloęr : qant a la tierse singuliere, il’ l’ęmpruntet du subjonctif, dont ęt fęt le futur optatif : ę pour tant nou’ dizons q’il falłe, q’il valłe.

Qant ao plurier, il ęt prins du prezęnt indicatif, exc̨epté ęncores la tierse, qi ęt ęmpruntée du subjonctif : de sorte qe nou’ dizons, vallons, vallez, valłet. Ao demourant, tout le ręste dę’ vęrbes ęn oęr ęmpruntet la seconde du prezęnt, exc̨epté auoęr, qi fęt ayes : ę sauoęr, qi fęt plutót sac̨hes, qe sę́s.

Ao regard dę’ tierses tant singulieres, qe plurieres, [p. 95v] il’ lęs ęmpruntet tous jeneralemęnt du sudit subionctif : come voęs, q’il voye, q’il’ voyet : q’il sac̨he, q’ils sac̨het : q’il sęye, q’ils sęyet, c̨haye, c̨hayet, q’il aye, ou eyt, q’il ayet : q’il dec̨oęue, q’il’ dec̨oeuet : mę́s qant ao’ premier’ ę seconde pęrsones, ęlles sont comunemęnt ęmpruntées du prezęnt indicatif : come dec̨euons, dec̨euez : exc̨epté auoęr, ę sauoęr, qi lęs ęmpruntet du subjonctif : come, pour auons, ę sauons, auez, sauez, ayons, ayez : mę́s sac̨hons, sac̨hez, ottet tout einsi qe c̨eus de la premiere conjugęzon .i. dę’ diphthonges io, ié : car le subjonctif fęt sac̨hions, sac̨hiez, tout einsi q’ęymions, ęymiez : combien q’aocuns ne lę’ prononc̨et pas ęn diphthonge : come, il veut qe nou’ l’ęymons, pour ęymions. Qant a soloęr, il n’a point d’imperatif.

Ao regard de la tierse conjugęzon ęn re, ęlle forme son imperatif de l’indicatif, come la premiere, sans rien immuer : fors qe la tierse singuliere de l’imperatif ęt formée de la plurier’ ęn ottant le t : de sorte qe de dizet, nou’ dizons, q’il dize, ę de díet, q’il díe. Par c̨e moyen nou’ dirons, pę́s, q’il pę́sse, pę́ssons, pę́ssez, q’il’ pę́sset.

Mę́s pouraotant qe fę́re ne garde pas la ręgle comun’ ęn son prezęnt indicatif, suyuant laqęlle il dút fę́re fę́zet, pour font, nous auons ęmprunté la tięrse du subjonctif, qi fęt fasse : ę ao plurier fasset : leqel j’ecry par deus ss, par c̨e q’il me sęmble q’ęlles y sont prononc̨ées, ny ne me suys pas amuzé a c̨e [p. 96r] q’on pourroęt dire qe c̨e seroęt pour la differęnc̨e de fac̨e, qi sinifíe le vizaje, aoqel il sęmble qe nou’ ne prononc̨on’ pas si viuemęnt deus ss. Ao demourant lę’ vęrbes qi n’ont point de prezęnt indicatif, n’ont point aosi c̨eluy de l’imperatif : ne conseqęmmęnt la tierse du singulier : parqoę soloęr, n’a point d’imperatif.

Ao demourant la qarte conjugęzon fęt de mę́mes qe la tierse : come fuys, q’il fuye, fuyons, fuyez, q’il’ fuyet.