Il faot ęntęndre qe notre lang’ a pluzieurs preteriz plusqe pęrfę́s : tous formez par linfinitif passé, ou bien par le partic̨ipe de c̨eus qi n’ont point d’infinitif passé.

Le premier donq se form’ auęq le preterit impęrfęt d’auoęr : de sorte, qe nou’ dizons jauoę ęymé : ę laotre par le partic̨ipe, qi se ioint ao preterit impęrfęt du vęrbe substantif : come jetoę venu, allé, mort, c̨hu.

Le second plusqe pęrfęt, se forme par le mę́me infinitif, auęq le preterit indetęrminé d’auoęr : [p. 93r] come j’ús ęymé, tu ús fęt : mę́s c̨eus qi n’ont point d’infinitif preterit, le peuuet former du mę́me partic̨ipe qe dessus, auęq le preterit indetęrminé du vęrbe substantif : come je fus venu, allé : combien q’a mon auis nou’ n’ęn vzon’ point, ou bien peu.

Le tiers plusqe pęrfęt se forme par le preterit pęrfęt d’auoęr, auęq le susdit infinitif : come, j’ey u ęymé, j’ey u fęt. Ę c̨eus qi le font par leur partic̨ipe, prenet le preterit pęrfęt, ę detęrminé du vęrbe substantif : come, j’ey eté venu, mort, arriué. Il faot toutefoęs ęntęndre qe nou’ n’ęn vzons aosi gyeres. Ao regard de c̨eluy q’on pourroęt former du preterit plusqe pęrfęt, come j’auoę u fęt, il me sęmble supęrflu : car j’auoę fęt, vaot tout aotant. Ie ne l’ey toutefoęs pas voulu lęsser ęn dęrriere : combien qe je ne le mettrey pas aoz exęmples dę’ conjugęzons.