L’optatif a deu’ preteriz pęrfęs : le premier dę’qels se forme par le premier prezęnt de l’optatif d’auoęr, aoroę, ou aroę, auęq l’infinitif preterit du vęrbe qe nou’ luy voulons joindre : come j’aoroę ęymé, dit, fęt, lu. Ę le second se forme par le mę́m’ infinitif, joint ao second prezęnt optatif d’auoęr : come j’usse voulentiers fęt voutr’ affę́re.

Mę́s c̨eus qi n’ont point d’infinitif passé, formet par leur partic̨ipe preterit joint auęq le vęrbe substantif leur’ deu’ preteriz, de la mę́me sorte qe lęs aotres : tęllemęnt qe le premier se forme par le premier prezęnt de l’optatif : ę le second par le second : come, je seroę allé, je seroę venu, je seroę mort, je fusse venu, je fusse mort.