Lę’ Vęrbes ont aosi bien qe lę’ noms, ę proms, simple figur’ ę compozée : la simple : come dire, voęr, oír : la compozée, come contredire, preuoęr, defíer. Mę́s qi ęn voudra conoętre la vraye compozic̨íon, il a bezoin d’ęntęndre la lange Latine, ę qelqe peu la Gręcqe : par c̨e qe le plus souuęnt l’une dę’ partíes de la compozic̨íon ęt inconú’ ao’ Franc̨oęs : come pre : com, qi sont freqęns, come compozer, combattre, preuoęr, preuenir. Il ęn ęt d’aotres ęn gran’ nombre.