Le futur de la premiere conjugęzon ęn er, ajoute, ey, as, a, ons, ez, ont, a l’infinitif prezęnt, come, a ęymer, ęymerey, ęymeras, ęymera, ęymerons, ęymerez, ęymeront. Il faot ęxc̨epter aller, qi fęt irey pour allerey, come s’il venoęt de ir. Par c̨e moyen c̨e vęrbe aller sęmbl’ ę́tre forjé de troę’ vęrbes qi sont hallac, vęrbe Hebrieu de mę́me sinificac̨íon : [p. 93v] ę de vado, & ire, vęrbes Latins : lęssęr fęt lęsserey, ę lęrrey, de lęrre inuzité.

La seconde conjugęzon ęn oęr forme diuęrsemęnt son futur, tout einsi q’ęlle fęt lęs aotres tęms : combien qe qant a la tęrminęzon, ęll’ ęt jenerall’ a toutes conjugęzons. Premieremęnt donqes c̨eus qi ont oul, auant oęr, come vouloęr, ę douloęr, formet diuęrsemęnt leur futur : par c̨e qe vouloęr tourne loęr, ęn drey, dras dra, voudrey, voudras, voudra : ę douloęr fera deulerey, ou deulrey, ou deuldrey.

C̨ęus qi ont al, auant loęr, tournet c̨et al, ęn la dipthonge ao, ę loęr, ęn drey, dras : come de valloęr, falloęr, c̨halloęr, vaodrey, faodrey, combien q’il ne s’uzurpe q’ęn la tięrse pęrsone, suyuant la sinificac̨íon de son infinitif : mę́s falłir l’ęmploye tout ęn sa sinificac̨ion : de sorte qe je faodrey, ęt aotant qe je falłirey.

Ao regard de c̨eus qi ont l’u consonant’ auant oęr : come voęr, pouruoęr, reuoęr, dec̨euoęr, pouuoęr, mouuoęr, voęr fęt vęrrey, ę de mę́m’ ęn tous sę’ compozez : come reuęrrey, prouuęrrey, ę pouruęrrey : ę de pouruoyer inuzité pouruoyerey vzité. Męs dec̨euoęr, conc̨euoęr, rec̨euoęr, deuoęr, feron’ tous vrey, pour voęr, come rec̨eurey, dec̨eurey, conc̨eurey : ę pouuoęr, pourrey : la ou mouuoęr fera mouuerey auęq tous sę’ compozez.

Mę́s plouuoęr fera pluurey, uras, ura : ę auoęr ę sauoęr tournet voęr ęn rey, ras, ra : ę peuuet ajouter a l’a prec̨edant vn o pour [p. 94r] fę́re diphthonge : de sorte qe nou’ dizons j’arey, ę j’aorey, je saręy, ę saorey. Qant a soęr, ę c̨hoęr, il’ font sęrrey, c̨hęrrey, einsi qe fęt voęr, vęrrey. Ao regard de soloęr, il n’ęt point pouruu ęn notr’ vzaje.

Qant a la tierse conjugęzon, ęll’ ęt mieus ręglée qe la seconde : car comunemęnt ęlle tourne l’e final de l’infinitif prezęnt ęn ey, as, a : de sorte qe de fę́re, vient je ferey, de tę́re, tę́rey : combien qe ferey chanje l’ę ouuert ę long de son infinitif, a vn e clós, ę brief : ę de trę́re, tręrey, de pourtrę́re, pourtrę́rey, de soudre, soudrey, de rezoudre, rezoudrey : de fríre, frírey, líre, lírey, de peindre, peindrey, de conoętre, conoętrey, pę́tre, pę́trey : de courre courrey, de clorre clorrey, de forclorre forclorrey, d’eclorre, eclorręy, de conclurre, conclurrey.

Męttre tourn’ aosi l’ę ouuęrt ęn e clós, come fę́re : mę́s il ne lę́sse pas pourtant a suyur’ ao demourant l’ordre dęs aotres : de sorte q’il fęt mettrey, qelqe sotte subtilité qe saroę́t alleger noz ecriueins de metterey, q’onqes home ne prononc̨a, ny n’ęt fondé ęn aocun’ apparanc̨e de rę́zon.

Ę combien qe nous ayons paroęr, aosi bien qe paroętre, si esc̨e qe le futur se forme de paroętre, ę ęn tous sę’ compozez : combien aosi qe nous ayons suyuir, aosi bien qe suyure, le futur toutefoęs de suyur’ ęt plus comun, qe de suyuir : car nou’ dizons plutót, je le suyurey, qe suyuirey : c̨e qe de mę́mes il faot dire de courre, [p. 94v] come qi fęt courrey. Qęrre aosi forme son futur, ę non pas qerir : car nou’ dizons qęrrey, ę non pas qerirey : mourir aosi fera mourrey, de mourre, inuzité.

Or qant a la qarte conjugęzon ęn ir, ęlle fęt de mę́mes qe la premiere son futur de l’indicatif, ęn adioutant ey, as, a : come, d’oír, oírey, ras, ra, rons, rez, ront : ę par transmutac̨íon de voęs, orrey, orras, orra. Mę́s combien qe falłir suyuant la ręgle fasse falłirey, ras, ra : il ne lęssę pas toutefoęs d’ęmployer c̨eluy de falloęr, qi fęt faodrey : come je le vous ey ja dit.

Ao demourant tenir, ę venir ne formet pas leur futur d’eus : car il se forme de la premiere pęrsone singuliere du prezęnt indicatif, ęn luy ajoutant drey, dras, dra, drons, drez, dront : etant c̨e d, (come ja je l’ey dit) comunemęnt jetté ęntre n, r. Parqoę de tien, vien, nou’ formerons tiendrey, tiendras, viendrey, viendras : ę einsi de leur’ compozez. Iezir ao ręste fera jęrrey, jęrras.