Le Pronom a (come nous auons ja dit) troę’ pęrsones, tout einsi qe lę’ verbes : dę’qęlles c̨ęll’ ęt ditte la premiere qi tient propos de soę mę́mes : come je vis a mon ę́ze. La second’ ęt c̨ęlle qi ęt prezente, ę a qi ęn parlant d’ęlle nous addressons notre propos : come, qęlle c̨hiere fę’ tu ? tu a’ bięn tęs ę́zes. La tiers’ ęt c̨ęlle, a qi on ne parle pas qoę q’on parle d’ęlle : come noz amiz nous secouriront.

Or faot il ęntęndre qe la premiere pęrson’ ę propremęnt ęntendú’ ao singulier : car ęlle peut compręndre toutes aotres pęrsones auęq vn vęrbe plurier : come toę, ę moę ferons c̨ela : toy, moę, ę luy irons la : ou luy ę moę irons la. Mę́s la seconde ne conc̨oęt qe la tierse : come toę ę luy fęrez c̨ela : nou’ ne diron’ pas de vrey, toę, ę moę, fęrez c̨ela.

Ao regard de la tierse, ęlle ne compręnt qe la seule tierse : come c̨eu’ c̨y, ę c̨eu’ la feront c̨ela. Ao demourant la premier’ ę seconde’ pęrsones, n’ont jamęs qe leur propre Pronom : si c̨e n’ęt par maniere d’ajoncc̨íon du substantif q’il’ demontret : come je C̨harles ey ecrit c̨ete prezęnte : fęs [p. 48v] c̨ela Pierre : ny ne peuuet la premier’ ę second’ ętre sans leur’ Pronoms expręs, ou sur ęntendus : la ou la tierse pęrsone ne le reqiert sinon par demonstrac̨íon, ou relac̨íon. Car le plussouuęnt le nom tient la plac̨e : come Pięrre rit : mę́s par demonstrac̨íon ou relac̨íon nou’ dirons, c̨etuy la qi ęt ęn c̨ete plac̨e se proumenant, ęt vn home bien auizé, il fęt bien sę’ bezoŋ̃es.