Du langaje, ou oręzon.

Chap. VI.

Le langaje, l’oręzon, le parler, ou propos, ęt vn batimęnt de vocables, ou parolles ordonées sorte, q’ęlles ręndet vn sęns conuenabl’ ę pęrfęt. Ę combien qe lę’ claozes ręsponsiues ęn la lange Franc̨oeze soę́t qelqefoęs, ę le plus souuęnt d’une parolle : ęll’ ęt toutefoęs de tęlle nature q’ęll’ ęt rec̨iproqe de la claoze de linterrogant, ęn affęrmant, ou niant : come ęte’ vous la ? ouí, ou non. Qi a batu Pięrre ? moę.

Or faot il ęntęndre qe pour la nec̨essité du batimęnt de notre langaje, il y peut ęntreuenir huyt partíes outre lęs articles : qi sont le Nom, le Pronom, le Vęrbe, le Partic̨ipe, la Prepozic̨íon, [p. 19v] l’Auęrbe, la Conjoncc̨íon, ę l’Intęrjęcc̨íon. Mę́s auant qe de vuyder rien dę’ huyt parties, nou’ depęc̨herons lęs articles.