La figure dę’ noms se c̨onoęt selon la qantité d’une, ou bien de deus, ou pluzieurs dicc̨íons conjointes ęnsęmble. Lę’ noms sont donqes d’une simple figure : come, Pięrre, Ian, home, c̨heual : ou bięn d’une compozée, come Contrerolleur, Boęuin. Or ęt il qatre manieres de noms compozez : l’une de deus ęntiers, come maleur : car mal ęt ęn son ęntier, aosi ęt eur. Ę ęn c̨e conoęsson’ nous q’il ęt conpozé : daotant qe mal ne pręnt pas sa tęrminęzon plurier’ ao plurier : de sorte qe nou’ ne dizon’ pas mals eurs pour maleurs, com’ il dút, s’il etoęt separé, com’ ajęctif.

La second’ ęt de deu’ corrompuz, come beniuole, daotant qe beni, ę uole, ne sinifíet rien separez. La tiers’ ęt d’un ęntier, ę d’un corrompu : come, ęnnemy : c̨ar ęn, ęt ęntier, ę emy corrompu. La qarte ęt dun corrompu, ęt d’un ęntier : come c̨hacun, aocun, qelcun. Ao demourant il n’ęt pas ao pouuoęr d’un pur Franc̨oęs d’exactemęnt epluc̨her c̨ęs manieres de compozez, sans la conoęssanc̨e dę’ langues Latine, ę Greqe.